O 25 de novembro é un día de reflexión e denuncia contra as diferentes formas de violencia que sofren as mulleres.
A idea de celebralo nace no Ier Encontro Feminista de Latinoamérica e do Caribe celebrado en Colombia en xullo de 1981.
En 1993 a Asemblea Xeral das Nacións Unidas aprobou a Declaración sobre a Eliminación da Violencia contra a Muller, na que se definiu a "violencia contra a muller" como
«todo acto de violencia baseado no xénero que ten como resultado posible ou real un dano físico, sexual ou psicolóxico, incluídas as ameazas, a coerción ou a prohibición arbitraria da liberdade, xa sexa que ocorra na vía pública ou na vía privada. »
O 17 de decembro de 1999, a Asemblea Xeral das Nacións Unidas designou o 25 de novembro como o Día Internacional da Eliminación da Violencia contra a Muller. A ONU convidou a «gobernos, organizacións internacionais e organizacións non gobernamentais a organizar actividades dirixidas a sensibilizar ao público respecto do problema neste día como unha celebración internacional.»
Elixiuse o 25 de novembro para conmemorar a morte das irmás Mirabal (Patria, Minerva e Maria Teresa), tres activistas políticas asasinadas o 25 de novembro de 1960 en mans pola policía secreta do ditador Rafael Trujillo na República Dominicana. Minerva e María Teresa previamente foron encarceradas, violadas e torturadas en varias ocasións.
Os seus cadáveres esnaquizados apareceron no fondo dun precipicio. Para o movemento popular e feminista de República Dominicana historicamente estas mulleres simbolizaron a loita e a resistencia.
.png)
