Limpeza da praia do Regueiro (San Valentín)

 Un ano máis o noso colexio participou na limpeza simultánea de praias organizada pola asociación Adega. 

Esta actividade, que se ía desenvolver o venres 25 de outubro, tivo que adiarse por mor do tempo ata o día 5 de novembro de 16:20 a 18:00 horas. 

O alumnado de 1º da ESO do noso colexio limpou a praia do Regueiro, no barrio de San Valentín. En menos de dúas horas retiramos 57,6 kg de lixo. Atopamos plásticos, anacos de cadeiras, patas de plástico, anacos de porespán, microplásticos, ...

Depositamos o lixo en contedores que pon á nosa disposición o concello de Fene, que tamén nos achegou luvas e sacos do lixo para facer a recollida. 

Aprendemos a importancia de colaborar en manter limpo o noso entorno e coidar o medio ambiente.

Unha experiencia moi positiva que temos pensado repetir. 

 

Reciclaxe de material escolar para a protectora Terracan

 No CPI A Xunqueira traballamos para mellorar a reciclaxe e axudar a coidar do medio ambiente e cumprir os obxectivos da Axenda 2030.

Estamos en lista de espera para ser punto de recollida de material escolar que xa está esgotado (bolígrafos, rotuladores, tippex,...)

Dende hai un tempo estamos recollendo este material e depositándoo nun contedor que temos na entrada do centro. 

O luns doamos este material á protectora Terracan. Eles entregarán este material a unha empresa que lles abona o material entregado. Estes cartos axudarán a pagar o alimento dos animais que teñen en acollida e os seus gastos veterinarios. 

Cumprimos dous obxectivos: coidar o medio ambiente reciclando e colaboramos na protección dos animais.

Esperamos poder seguir a facelo e, por iso, o alumnado de proxecto competencial do curso pasado elaborou unhas caixas que repartimos polas aulas para que o alumnado vaia deixando ahí o material usado para reciclar. Despois xuntarémolo todo e volveremos doalo.

Obradoiro de narración oral

 Contamos coa presenza de Charo Pita, escritora, actriz e contacontos que lles veu impartir un obradoiro sobre narración oral ao alumnado de 5º e 6º de primaria e aos colaboradores da biblioteca da ESO.

Agora só queda aplicar o aprendido nos próximos podcasts!!